Lied "Worum sit dir so unerschütterlich?" (Franz Hohler)
Gesungen an der schweizerischen Anti-AKW-Demonstration am 21. Juni 1986 vor dem Atomkraftwerk Gösgen, die als Reaktion auf den Reaktorunfall vom 26. April 1986 in Tschernobyl (Ukraine) durchgeführt wurde.
Urheber
| Autor | Franz Hohler | ||||||||||||||||||
| Texttitel | Worum sit dir so unerschütterlich? | ||||||||||||||||||
| Untertitel | |||||||||||||||||||
| Sprache | Schweizerdeutsch | ||||||||||||||||||
| |||||||||||||||||||
Originaltext
Worum sit dir so unerschütterlich?
Sit guet zwe Wuche sig d Lag i eusem Land
radiologisch normal
– das bitzeli Caesium i de nöchschte 30 Johre... –
d Alarmzentrale blost zum Ändalarm
un i zum Bilanzchoral:
Jetz isch also z Russland wyt ewägg
es Räschtrisiko explodiert.
Theoretisch gits das all 10'000 Johr
jetz isch's halt e chli früeh passiert.
Dänket a die Rueh, wo mir wärde ha
während 9'900 Johr
und grad mir i der sichere, subere Schwiz
bi eus gits nid die gringschti Gfohr.
(Refrain-Melodie summen)
Leider het jo d Wolke vo Tschernobyl
der Sonderfall Schwiz ignoriert.
Der Herr Egli het als Sofortmassnahm
im Herr Schlumpf und im Herr Stich telefoniert
öb är öppen am Färnseh en Aschproch sell halte
Nur das nid, heige beidi gseit
D Schwizer wäre süsch nur in Panik cho
und hätte d Schtrahlig no schlächter vertreit.
Exgüsi, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
D Russe si d Laggle, bi eus isch's ganz andersch
sägen alli atomare Clüb
Dä Reakter do hinde isch besser und brever
– und s isch ganz en andere Typ! –
Wemer witer zvill Schtrom wei, denn "Kaiseraugst ja!"
Mir hei gar kei anderi Wahl
und es bitzeli Gfohr mues halt sy im Läbe
dasch doch gopfridschtutz normal!
Herr Kohn, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
90'000 Mönsche evakuiert
und 10'000 versüücht
Isch das e Chrieg oder isch das e keine
Was gits denn, wo däm süsch no glycht?
D AVES findet im glyche Momänt
e Bedarfsnachwiis bruuchis nit
Wär e Chraftwärk well boue, dä sells chönne boue
öb ohni Atom oder mit.
Herr Blocher, Herr Kohn, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
Der Herr Hueber, wo eus gäge d Schtrahle sett schütze
het gseit, är sig überrascht
Nie hätt är glaubt, dass vo so wit ewägg
e so vill chiem vo däre Lascht.
I glaub, dä list nid die richtige Büecher
ämel nid die glychlige wie n i
Dört drin isch nämlech sit Johre beschribe
wie schlimm das en Unfall cha sy
Herr Hueber, Herr Blocher, Herr Kohn, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
Was d Gränzwärt betrifft für eusi Gsundheit
do heimer zum Glück chönne gseh
mir Schwizer si zäch, im Verglych zu de Dütsche
verträge mir sibemol meh, juhee!
Trotzdäm hei d Chind meh Jod übercho
als vo Gsetzes wäge dinne lit.
Das Gsetz heige mir de nid öppe umgange
nur agwändet heige mers nit.
Herr Prêtre, Herr Hueber, Herr Blocher, Herr Kohn, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
Vo eusne Verträter im Parlamänt
wo sinerzit für Kaiseraugst si gsi
hei nume grad drei ihri Meinig gänderet
die übrige blibe derby.
Der Herr Ryschkow in Moskau gsehts au nid andersch
jetz lueg au, die Liaison
Do laufe mir plötzlech Arm in Arm
mit der böse Sowjetunion.
Herr Prêtre, Herr Hueber, Herr Blocher, und Herr Ryschkow zmitts drin,
Herr Kohn, Herr Egli, Herr Schlumpf und Herr Stich
worum sit dir so unerschütterlich?
Sit dir us Beton oder Granit?
I begryffen ech nit
i begryffen ech nit!
Berueiget ech doch, es isch alles erforscht
so het men eus immer gseit
und jetz, wo s passiert isch, weis niemer, was mache
en einzigi Rotlosigkeit.
Ke Mönsch weis, wie d Wirkige würklech si
vo somenen einzige GAU.
Verschtöht dir ächt zmindescht, dir schneidige Herre
d Angscht vonere schwangere Frau?
HERR Prêtre, HERR Hueber, HERR Blocher, HERR Ryschkow, HERR Kohn, HERR Egli, HERR Schlumpf und HERR Stich
worum sit dir so unerschütterlich?
Worum sit dir so unerschütterlich?
Worum sit dir so fürchterlich un – er – schüt – ter – lich?