Lied "Uf eme Brüggli über d Autobahn" (Franz Hohler)
Aus dem Programm Schubert-Abend (1979).
Urheber
| Autor | Franz Hohler | ||||||||||||||||||
| Texttitel | Uf eme Brüggli über d Autobahn | ||||||||||||||||||
| Untertitel | |||||||||||||||||||
| Sprache | Schweizerdeutsch | ||||||||||||||||||
| |||||||||||||||||||
Originaltext
Uf eme Brüggli über d Autobahn
Uf eme Brüggli über d Autobahn z Köllike-Wescht
gseht me mängisch es paar Bueben uf de Velo obe sitze
und sech lässig mit der einte Hand as Brüggligländer schtütze
und jede luegt uf d Schtrooss und isch der bescht.
Si hocken uf de Sättel und bamble mit de Bei
die einte zelle d Auto und die andere zelle d Marke
und alli unterscheide scho die schwache vo de schtarke
und näme für die schnällere Partei.
Die einte zelle d Länder und die andere d Kantön
im Grund gnoh setten alli scho deheim sy, doch es reut se
denn luege si wär besser breicht bim Obenabeschpöize
Appezäll isch sälten und Frankrych isch schön.
Sie wüssen au genau, was wele Lärme macht
und rede nur vo Chläpf und vo Chären und Maschine
und hoffe, das es einisch diräkt under ihne
so richtig gwaltig tschäderet und chracht.
Si mole sechs no us, und derwile schtoht scho fescht
wär vo dene Buebe mol e Wage wird schtüüre
und bi däm Unfall sis Läbe mues verlüüre
undrem Brüggli über d Autobahn z Köllike-Wescht.