Chürzlech simer züglet
Usem Dörfli zmitts i d Schtadt
Zum Fänschter us gsehni i der Wyti
Schatt em Glärnisch s Zentrum Glatt
Jetzt wohnemer wider bi de Lütte
Verschticken i de Nochbere fascht
Si gsehnis i d Schtube, i d Chuchi
Aber eis het üs überrascht
Es si alli so nätt
Es si alli so nätt - würklech, do seit men immer, me chönn nur ufem Land persönlech läbe
Es si alli so nätt - das säge nur die, wo i der Schtadt ke Wohnig gfunde hei
Es si alli so nätt - isch es puurs Vorurteil
Es si alli so nätt
Mängisch, do machi Züüg ab
Wo d Familie lydet derby:
Muesch jetz uf Brig go schpile
Seit d Frau und luegt truurig dry.
Weisch, sägi nochhär und hüeschtle
S isch eifach nid andersch gange
Die hei so lieb gfrogt u gschribe
I ha se nid chönne lo hange
S si alli so nätt
S si alli so nätt - du kennsch jo d Frau Schreiner und der Herr Roggemoser vom Chällertheater, die hei mängisch gnue aaglütte
Es si alli so nätt - und wenn du s Publikum gsechtisch
Die si alli so nätt - und schliesslich mues me de Lütt zeige, dass es weschtlich vo Züri au no Kabarettischte git, und grad die
Si alli so nätt - i chume drum urschprünglech vo Olte. Olte bi Gösge.
I bi z Gösge go demonschtriere
Will i gäge d Atomchraft bi
Druf lade mi d Chärnchraftherre
Zunre chlyne Besichtigung y
Si zeige mir ihre Tämpel
Denn sitze mer zäme n a Tisch
Üsi Meinig isch komplett verschide
Aber was s verrücktischten isch
Es si alli so nätt - würklech
Es si alli so nätt - si doch Familieväter wie du und i
Es si alli so nätt - si sogar Wildwasserfahrer und Schilangläufer
Es si alli so nätt - wüsse würklech, was Natur isch
Es si alli so nätt
I ha mi dermit beschäftiget
Wäm d Schwiz im Grund gnoh ghört
Und i bi uf paar Näme gschtosse
Aber denn hani es paar dervo troffe
Vo der chlyne, mächtige Härde
Wonis allne der Marsch blost, i säg ech
Es isch würklech zum wahnsinnig wärde
S si alli so nätt
Es si alli so nätt - grüezi, Herr Dokter, gueten Obe, Herr Diräkter
Es si alli so nätt - hei sogar Sache vo mir gläse
Es si alli so nätt - kenne einzelni Schtellen us em Totemügerli uswändig
Es si alli so nätt
Letschthin traum i tatsächlech
I hoffen es wird nie wohr
Me heig mi zum Tod verurteilt
I sigi e z grossi Gfohr
Aber s schlimmschte, churz vor em Chöpfe
Si all die fründleche Grind
Vo Schtaatsaawalt, Richter und Hänker
S isch wyt und breit kei Find
S si alli so nätt - dörfe mir Ihne die Binde um d Auge legge?
Es si alli so nätt - hei Si no ne letschte Wunsch?
Es si alli so nätt - ah, Si sind Nichtraucher
Es si alli so nätt - denn legge Si jetz bitte Ihre Chopf uf dä Pflock do
Es si alli so nätt, so nätt, so unheimlich, so grauehaft NÄÄÄÄÄTTTT!
DE: Darmstadt, Neuwied : Hermann Luchterhand